Жапын геройжо-влак

Таче мемнан геройна Кӧкыш ялын тале рвезыже Артём Биктимиров. Рвезе Украина территорийыште специальный военный операцийыште участвоватла. Кызыт тудо шочмо ялышкыже отпускышко толын.

Ӱлыл Качмаш ялсовет гыч ныл рвезе специальный военный оперцийыште участвоватлат. Эше коктын доброволец семын тушто тушман ваштареш кучедалыт.

Ялысе клубышто Артём дене вашлиймашым эртареныт. Тышке изижат, кугыжат погыненыт. Вашлиймашым ялысе клубын культорганизаторжо Олеся Кугубаева почо.

Тыгак шуко поро мутым Ӱлыл Качмаш ялсовет администраций вуйлатыше Вера Владимировна Манаева ойлыш:

– Специальный военный оперций тӱҥалмеке, мемнан рвезе-влакымат тушко ӱжаш тӱҥальыч. Тендан ял гыч тышке Биктимиров Артём Рудикович кайыш. Таче тудо мемнан дене улеш, отпускышко толын. Артёмын толмыжым чыланат вучент, поснак ачаже ден аваже, шольыж ден шӱжарже-влак, ял калыкат тудым вучен.

Кугешнена ме тый денет, Артём. Ме палена, тый чын, лӱдде служитлет. Таза лий, Юмо тыйым умбакыжат арален шогыжо. Чыланат, кӧ тушто кредалеш, тек мӧҥгышкышт таза да эсен пӧртыл толышт.

Тыгак ялын старостаже Манисов Станислав Сафиевич, моло-влакат Артёмлан шуко поро да чонеш логалше тыланымаш-влакым каласышт.

Ӱдырамаш-влак ансамбль Артёмлан мурым, рвезе ден ӱдыр-влак куштымашым пӧлеклышт.

Вашлиймашке толшо калыкат Артёмлан шуко йодышым пуыш.

Кузерак вара тушто иледа йодышлан, Артём тыгерак вашештыш:

– Шкат чыла паледа, очыни. Илена сайын. Блиндаж-влакым, мончам чо‰ышна, вынемым кӱнчышна. Кажне позицийыште, конешне, тӱрлӧ семын лиеш.

– Калтаса район гыч шукын улыда?

– Да, Калтаса район гыч шукын улына. Иктаж 50 наре еҥ.

– Кузерак пукшат?

– Кочкаш чыла уло. Чыла сита. Полевой кухня кочкаш ямдыла, нуно огыт етше гын, кочкаш ме шке шолтена.

– А гуманитар полыш миен шуэш?

– Миен шуэш. Ну кузе каласаш, пытартышыже миен шуо.

– Эм-влак шотышто кузе?

– Эм-влакат ситат. Огыт сите гын, мемнан батальонышто Ӱлыл Качмаш ял гыч медик Костя Айдаков уло, ме тудын деч йодына. Тудо мыланна иктаж уколым, обезболивающийым конден кода. Тыге ик мут дене каласаш гын, чыла сай. Машинана уло, тудым пытартыш гуманитар полыш дене конденыт. Район вуйлатыше шке намиен.

– Те Украиныште кызыт кушто кредалыда?

– Луганский областьысе Кременной ола деч ӧрдыжтырак, краснолиманский направлений дене.

Конешне, Артём чылажымат ыш ойло, военный тайне, шуко ойлыман огыл.

Артём Кӧкыш ялыште шуко икшыван ешыште шочын. Ӱлыл Качмаш кыдалаш школышто шинчымашым поген. Вара Нефтекамск оласе 59 №-ан лицейыште автомеханиклан тунемын. Ик жап гыч тудым армий радамыш налыныт. Артём 2014-2015 ийыште Подмосковьеште 4-ше гвардейский танковый Кантемировский дивизийыште службым эртен. Армий деч вара вахте йӧн дене пашам ыштен.

Специальный военный операций кайыме зонышко Артём Биктимиров 29 сентябрьыште каен. Вашлиймаш деч вара мый Артём дене мутланышым. Рвезе шуко кутыраш ок йӧрате. Йодыш-влакланат тудо кӱчыкын да раш вашештыш.

– Артём, тый сентябрь мучаште СВО-ке каенат. Кӧ тыйым ужатен?

– Родо-шочшем, лишыл еҥем, уло ял калык ужатыш.

– Могай частьыште служитлет, должностет могай?

– Мотострелковый полк, сапёр улам.

– Верысе калык тендан дене кузерак мутлана?

– Калык тушто поро, полшаш тыршат. Но шоҥго еҥ-влак деч нимом ида нал, отравитлен кертыт маныт.

Вашлиймаш мучаште чыланат пырля погынен, чайым йӱыч. Артёмлан изирак пӧлекым кучыктышт. Клуб пашаеҥ, артист-влак Артёмлан, тудын ачаж ден аважлан ӱстел тич тӱрлӧ сийым ямдыленыт. Чайым йӱыныт, муреныт, мутланеныт. Тыштат, ӱстел коклаште, Артёмлан поро тыланымаш-влакым шуко ойленыт.

Теве тыгай проста, но тале да лӱддымо рвезе-влак мемнан районышто илат да Шочмо элыштым аралат. Артёмынат отпускшо мучашке лишемеш. Тудо вашке уэш специальный военный операций эртыме зонышко пºртылеш.

Меат Артёмлан чыла сайым гына тыланен кодына. Таза да эсен мӧҥгышкет пӧртыл тол. Тек коштмо корныштет тыйым Юмо арала. А ме, Кӧкыш ял калык, тыйым сеҥымаш дене пӧртылмедым вучаш тӱҥалына.

Алёна Илтимирова